കേന്ദ്ര സര്‍ക്കാറും മഅ്ദനിക്കെതിരെ ഒളിയുദ്ധം നടത്തുന്നു -പി.ഡി.പി
Monday, September 6, 2010
കാസര്‍കോട്: കേന്ദ്രസര്‍ക്കാറുമായി ബന്ധപ്പെട്ടവരും മഅ്ദനിക്കെതിരായ ഒളിയുദ്ധം ശക്തമാക്കിയിരിക്കുകയാണെന്ന് പി.ഡി.പി സംസ്ഥാന വൈസ് ചെയര്‍മാന്‍ സ്വാമി വര്‍ക്കല രാജും ട്രഷറര്‍ അജിത്കുമാര്‍ ആസാദും വാര്‍ത്താസമ്മേളനത്തില്‍ ആരോപിച്ചു. കര്‍ണാടക സര്‍ക്കാറിന്റെ രാഷ്ട്രീയ ലക്ഷ്യം എല്ലാവര്‍ക്കും അറിയാം. പി.ഡി.പി നേതാവ് അബ്ദുല്‍ അസീസിനെ സി.ബി.ഐ അറസ്റ്റ് ചെയ്തത് കേന്ദ്രത്തില്‍ ചിലര്‍ തുടങ്ങിയ ഒളിയുദ്ധത്തിന്റെ ഭാഗമാണ്. ഇതുവരെ പുറത്തുപറയാത്ത ഒരു വാറണ്ടിന്റെ പേരിലാണ് അദ്ദേഹത്തെ അറസ്റ്റ് ചെയ്തത്. മഅ്ദനിക്ക് നീതി ലഭ്യമാക്കുന്നതിന് നേതൃത്വം നല്‍കാന്‍ ബംഗളൂരുവില്‍ എത്തിയപ്പോഴാണ് അസീസിനെ അറസ്റ്റ് ചെയ്തത്. മഅ്ദനിക്ക് നീതി ലഭ്യമാക്കാന്‍ മുഴുവന്‍ ജനങ്ങളെയും അണിനിരത്തും. ത്രിതല പഞ്ചായത്ത് തെരഞ്ഞെടുപ്പില്‍ മഅ്ദനി വിഷയം ഉയര്‍ത്തിക്കാട്ടി എല്ലാ പഞ്ചായത്തിലും മല്‍സരിക്കും. സംസ്ഥാന സെക്രട്ടേറിയറ്റംഗം കെ.വി. പുരുഷോത്തമന്‍, ജില്ലാ പ്രസിഡന്റ് പി.എ. സുബൈര്‍ പടുപ്പ് എന്നിവരും വാര്‍ത്താസമ്മേളനത്തില്‍ പങ്കെടുത്തു.
No comments:
Post a Comment